കൂട്ടുകാരി

കൂട്ടുകാരി
***************
ഓമനിക്കാൻ എൻറെ ഓർമയിൽ പോലുമെൻ
ഓമലേ നിൻ മുഖചന്തമില്ല
ഓരോ വസന്തവും കൈ വിട്ടു പോയ പോൽ 
നീയും കടന്നു പോയി എത്ര മുൻപേ

നാടിൻറെ നേരുള്ള പെണ്ണായിരുന്നു നീ
നാണം തുടുക്കുന്ന കണ്‍കളുള്ളോൾ
നിന്നിൽ ചുരിങ്ങിയോൾ ,നീയെന്ന നന്മയെ
നിന്റേതു മാത്രമായി കാത്തു വെച്ചോൾ

പണ്ടേ കളിച്ചു നാം ഒന്നിച്ചു തന്നെ;യെൻ
പാതിയും നീ തന്നെ ആയിരുന്നു
പിച്ചിയും മാന്തിയും കൊഞ്ഞനം കാട്ടി നാം
പിച്ചകപ്പൂക്കൾക്ക് വാശി വെച്ചു

എന്തേ മലർപൊയ്ക കണ്ടൊരാ മാത്രയിൽ
എന്നെ തനിച്ചാക്കി നീ ഇറങ്ങി
എത്രയോ നേരമാ നീരിന്റെ തീരത്ത്
എൻറെ പൊന്നാതിരേ ഞാൻ കരഞ്ഞു

പിച്ചകപ്പൂവിനായി തള്ളി ഞാനിട്ടതെന്നപ്പോഴേ
പാടി പറഞ്ഞു കേട്ടു
പൂവെനിക്കേകിടാൻ നീയെന്നെയൊരത്ത്
പാറാവ്‌ നിർത്തുന്നതാരു കാണാൻ

എന്നിട്ടുമാതിരേ ഞാനിപ്പോഴും രാത്രി
എന്നെപ്പുണർന്നീടിൽ നിന്നെയോർക്കും
എപ്പൊഴെത്തും കാലിനൊരത്തു നീയെൻറെ
ചങ്ങലക്കെട്ടൊന്നു പൊട്ടിച്ചിടാൻ ..!!!!

ആദില കബീര്‍