ശലഭ മഴ

മഴ നനയാൻ വരുന്നോ ..

ശലഭ മഴ ..!

ഒന്ന് ..രണ്ട് ..മൂന്ന് ..

ശലഭത്തുള്ളികൾ ഇറ്റിറ്റു വീഴുന്നു 

നമുക്കീ  മൈതാനിയിൽ 

മേലേക്ക് ..മേലേക്ക്..  നോക്കികിടക്കാം 

വസന്തം വർണമെറിയും പോലീ 

പൂമ്പാറ്റ മഴ നനഞ്ഞു ചിരിക്കാം ..

ചിറകിലെ ചായമിറ്റിച്ച് 

നനഞ്ഞു കുതിർന്നു പൂമ്പാറ്റകൾ 

പെയ്തിറങ്ങുന്നത് കാണാൻ 

എത്ര ചന്തം..!!!

മഴ കഴിയും  മുമ്പീ 

മഞ്ചാടി വഴിയിലൂടെ 

വെള്ളാരം കല്ലിന്റെ തണുപ്പറിഞ്ഞ് 

കൈ കോർത്ത് നമുക്കോടാം 

നീ ചിരിക്കുന്നു 

നിന്റെ കണ്ണിലും രണ്ട് ശലഭങ്ങൾ 

പെയ്തിറങ്ങുന്ന ശലഭങ്ങൾ..!!!

നമുക്കും പെയ്യാം..?

ചിറകു വിടർത്തി ശലഭങ്ങളായ് 

തെന്നിപ്പറന്ന് 

ഒടുവിൽ ..........

പെയ്ത്  തളരുമ്പോൾ 

ചിറകു കുഴഞ്ഞ്  മഞ്ചാടി വഴിയിൽ 

പ്രണയിച്ചു  ലയിക്കാം ..

ശലഭ തുള്ളികളായ് മണ്ണിൽ ഉറങ്ങാം..

ശലഭ മഴ ..ഇപ്പോഴും പെയ്യുന്നു ..!!!

ചിന്നി ചിന്നി !!!!!